काठमाण्डाै – राष्ट्रिय प्रजातन्त्र पार्टीको नयाँ नेतृत्वका लागि भएको चुनावमा अध्यक्षमा पराजित कमल थापा पक्षले वर्चस्व ल्याएका छन् ।
राप्रपाका चार उपाध्यक्षमध्ये तीन उपाध्यक्ष थापा पक्षका विजयी भएका छन् । त्यसैगरी तीन महामन्त्रीमा दुई जना थापा पक्षका उम्मेदवार विजयी भएका छन् ।
पार्टीको खुल्ला उपाध्यक्षमा विक्रम पाण्डे सर्वाधिक मत ल्याएर विजयी हुँदा कमल थापा प्यानलबाट उठेका बुद्धिमान तामाङले १ हजार ९ सय ४४ मत ल्याएर विजयी हुनु भएको छ । थापा प्यानलकै ध्रुवबहादुर प्रधान १ हजार ८ सय १४ मतसहित विजयी हुनु भएको छ ।
महिला उपाध्यक्षमा पनि थापा पक्षकी रोशन कार्की विजयी हुनु भएको छ । उहाँले १ हजार ६ सय ८९ मत पाउनु भएको छ । महामन्त्रीको प्रतिस्पर्धामा थापा पक्षकै भुवन पाठक १ हजार ८ सय ५ मतसहित विजयी हुनु भएको छ भने लिङ्देन पक्षका धवलशम्शेर राणा सर्वाधिक २ हजार २ सय २१ मतसहित विजयी हुनु भएको छ ।
यस्तै, महिला महामन्त्रीतर्फ भने कमल थापा समूहकी कुन्ती शाही विजयी हुनु भएको छ ।
